ТЫВАНЫҢ ЮСТИЦИЯ ЯАМЫЗЫ САГЫНДЫРЫП ТУР: АВА (ӨГ-БҮЛЕ) КАПИТАЛЫНЫҢ АКШАЗЫН ХОЛГА АП ТУДАРЫ – ХООЙЛУГА ДҮҮШПЕС!
Ийи болгаш оон-даа хөй ажы-төлдүг өг-бүлелерге күрүне деткимчези көргүзер арга хоойлу езугаар 2007 чылдың январьдан эгелеп күштүг болуп кирген деп чүве билдингир. Россияның Пенсия Фондузу чүгле эрткен чылда өг-бүле капиталынче 312 млрд. акшаны чарыгдаан.
Күрүнеден алган акшаны элээш каш угланыышкыннарже чарыгдап болур: чурттап турар байдалын экижидери, ажы-төлдүң өөредилгезин төлээринче азы аваның пенсия акшазы курлавырлап чыырынче. Акшаны өске сорулгаларже ажыглап чарыгдаарга – кеземчеге онаажып, (РФ КД-нуң 159.2 чүүлү-биле) шииттирип болур.
Ава капиталының сертификадын алган улус боттары-ла ол акшаны, хоойлуну ажа халааш, тускай схемалар ажыглап азы мегечи мөлчүкчүлер дузазы-биле акшаның саазын бодун холга киирип алырын бо-ла бодай бээрлер. Ынчалзажок, ындыг чүүлдерге киржири дээрге-ле кем-херек кылырынга каттыжып турары ол боор деп чүвени кезээде сактып аар болза эки.
Бир эвес сертификат акшазын холга киирип апкан кижиниң буруузу шынзыттына берген болза, ол кижиге кара-бажыңга 6 азы 10 чылга чедир хуусаага хоругдадыры болгаш ава капиталының акшазын долузу-биле дедир эгидери көрдүнген. Санкция-биле азы шииткел онаарының торгаар болгаш албан ажылдар кылдыртыр дээн ышкаш өске-даа хевирлери көрдүнген.
Болур болбас чүве чедип аар дээш, кем-херек кылып аар айыылга таваржы бээриниң бетинде, бодунуң келир үеде салым-чолунуң дугайында бодаар херек: үрелип калган чуртталганы болгаш идегел чок караңгы келир үени элээн каш чүс муң акша-биле эдип аары болдуна бээр деп бе.